તમિલનાડુના કુન્નુરમાં હેલિકોપ્ટર દુર્ઘટનામાં CDS જનરલ બિપિન રાવતના મોત બાદ દેશભરમાં શોકની લહેર છે. બુધવારે આ ઘટના બાદ તરત જ વાયુસેનાએ પણ તેના સ્તરે તપાસના આદેશ આપ્યા છે.
આ અકસ્માતમાં જનરલ રાવતની પત્ની અને અન્ય 11 લોકોના પણ મોત થયા હતા. દરમિયાન, સેનાના પૂર્વ બ્રિગેડિયરે આ દુર્ઘટનાને લઈને કોઈ કાવતરું હોવાની શક્યતા વ્યક્ત કરી છે.
પૂર્વ બ્રિગેડિયર સુધીર સાવંતે આશંકા વ્યક્ત કરી છે કે આ અકસ્માત નહીં પણ કાવતરું હોઈ શકે છે. વાયુસેનાનું Mi-17V5 હેલિકોપ્ટર જેમાં બિપિન રાવત સહિત અન્ય તમામ લોકો સવાર હતા, ચોપર કુન્નૂરના કટેરી વિસ્તારમાં ક્રેશ થયું હતું.
આ વિસ્તાર દુર્ગમ તેમજ ગાઢ વૃક્ષોથી ઘેરાયેલો છે પૂર્વ બ્રિગેડિયરનું કહેવું છે કે આ વિસ્તાર એલટીટીઈનો છે. આ દુર્ઘટના પાછળ LTTEના સ્લીપર સેલનો હાથ હોઈ શકે છે. પૂર્વ બ્રિગેડિયર સુધીર સાવંતે આ ઘટનાની રાષ્ટ્રીય તપાસ એજન્સી તપાસની માંગ કરી છે.
જો કે આ દુર્ઘટના પાછળ હવામાન પણ મુખ્ય કારણ હોવાનું માનવામાં આવે છે. કહેવામાં આવી રહ્યું છે કે ગાઢ જંગલ, પહાડી વિસ્તાર અને ઓછી વિઝિબિલિટીના કારણે હેલિકોપ્ટર ક્રેશ થયું હતું. એવી આશંકા છે કે વિઝિબિલિટી ઓછી હોવાના કારણે હેલિકોપ્ટરને ઓછી ઊંચાઈએ ઉડવું પડ્યું હશે.
નીચે ગાઢ જંગલ હતું, તેથી હેલિકોપ્ટર એ સમયે ક્રેશ-લેન્ડ થયું હોવું જોઈએ. જણાવવામાં આવી રહ્યું છે કે જનરલ રાવતનું હેલિકોપ્ટર બુધવારે સવારે લગભગ 11.47 વાગ્યે ટેકઓફ થયું હતું. આ પછી લગભગ 12.22 વાગ્યે એટીસીનો હેલિકોપ્ટર સાથેનો સંપર્ક તૂટી ગયો.
તેના થોડા સમય બાદ હેલિકોપ્ટર ક્રેશના સમાચાર સામે આવ્યા હતા. હેલિકોપ્ટરના બ્લેક બોક્સની તપાસ કરવામાં આવે તો દુર્ઘટનાના કારણો સામે આવી શકે છે. હેલિકોપ્ટરમાં કોઈ ટેકનિકલ ખામી હતી કે કેમ તે પણ જાણવામાં આવશે.
