ગીર-સોમનાથના વેરાવળમાંથી એક બોટ રક્ષાબંધનની પૂજા કરીને માછીમારી માટે નીકળી હતી. ત્યારબાદ વલસાડના ઉમરગાંવની બોર્ડર પૂરી કર્યા બાદ બોટમાં ટેકનિકલ ખામી સર્જાઈ હતી. જેના કારણે માછીમારોએ તરત જ કંટ્રોલ રૂમ અને કોસ્ટગાર્ડને જાણ કરી હતી અને બોટ દરિયામાં ફસાઈ જતાં મદદ માંગી હતી. આ પછી દમણ કોસ્ટ ગાર્ડની ટીમે રેસ્ક્યુ ઓપરેશન હાથ ધરીને હેલિકોપ્ટરની મદદથી તમામ 10 માછીમારોને સુરક્ષિત બહાર કાઢ્યા હતા.

અચાનક બોટનું એન્જિન બંધ થઈ ગયું
મળતી માહિતી મુજબ વેરાવળની હરેશ્વરી બોટ મુંબઈ તરફ જઈ રહી હતી. ત્યાર બાદ ઉમરગાંવ તાલુકાનો દરિયા કિનારો પૂરો કર્યા બાદ બોટનું એન્જીન ખરાબ થઈ ગયું હતું, જેના કારણે મધ્યરાત્રિએ મહારાષ્ટ્રના મુરુડ જીંજરા પાસે બોટ અચાનક બંધ થઈ ગઈ હતી અને તમામ માછીમારો દરિયામાં ફસાઈ ગયા હતા.

આ ઘટના બાદ માછીમારોએ તાત્કાલિક કંટ્રોલ રૂમને વાયરલેસ દ્વારા જાણ કરી મદદ માંગી હતી. ઘટનાની માહિતી મળતાં દમણ કોસ્ટ ગાર્ડની ટીમ હેલિકોપ્ટર દ્વારા ઘટનાસ્થળે પહોંચી હતી અને લગભગ એક કલાકના રેસ્ક્યુ ઓપરેશન દરમિયાન તમામનો જીવ બચાવ્યો હતો.
બચાવ કામગીરી માટે હેલિકોપ્ટરનો ઉપયોગ કરવામાં આવ્યો હતો

મહારાષ્ટ્રની દરિયાઈ સીમામાં ફસાયેલી માછીમારોની બોટ વેરાવળની હતી. બોટનો પાછળનો પંખો નીકળી ગયો હતો, જેથી બોટ અચાનક બંધ થઈ જતાં માછીમારોએ કંટ્રોલ રૂમમાં ફોન કરીને કોસ્ટગાર્ડની મદદ લીધી હતી.
માહિતી મળતાની સાથે જ દમણ કોસ્ટ ગાર્ડની ટીમ હેલિકોપ્ટર દ્વારા મહારાષ્ટ્રના જંજીરાના મુરુડ સી એક્સટેન્શનમાં ફસાયેલા માછીમારોને બચાવવા પહોંચી હતી. આ દરમિયાન બોટમાં ફસાયેલા 4 ખલાસીઓ ઉમરગાંવ તહસીલ અને 3 દમણના રહેવાસી હોવાનું બહાર આવ્યું છે.