મોબાઈલ ગ્રાહકો માટે સારા સમાચાર છે. સરકારે હવે ગ્રાહકોને નવું મોબાઈલ કનેક્શન મેળવવાનું વધુ સરળ બનાવ્યું છે. ગ્રાહકો હવે નવા મોબાઈલ કનેક્શન માટે ઓનલાઈન અરજી કરી શકે છે અને એટલું જ નહીં, હવે સીમ કાર્ડ તેમના ઘરે પહોંચી જશે.

આ માટે, ગ્રાહકો આધાર અથવા ડિજીલોકરમાં કોઈપણ દસ્તાવેજ સાથે વેરીફીકેશન કરી શકશે. ટેલિકોમ વિભાગે આ માટે ઓર્ડર જારી કર્યો છે. DoT નું આ પગલું 15 સપ્ટેમ્બરના રોજ કેબિનેટે મંજૂર કરેલા ટેલિકોમ સુધારાઓનો એક ભાગ છે.

જારી કરાયેલા નવા આદેશના નિયમો અનુસાર, નવા મોબાઈલ કનેક્શન માટે UIDAI ની આધાર આધારિત ઈ-કેવાયસી સેવા દ્વારા પ્રમાણપત્ર માટે વપરાશકર્તાઓ એ માત્ર 1જ રૂપિયો ચૂકવવો પડશે.

સરકારે પ્રીપેડને પોસ્ટપેડમાં રૂપાંતરિત કરવા માટે નવી વન ટાઇમ પાસવર્ડ (ઓટીપી) આધારિત પ્રક્રિયા માટે ઓર્ડર જારી કર્યો છે. સરકારે જુલાઈ 2019 માં ઈન્ડિયન ટેલિગ્રાફ એક્ટ, 1885 માં સુધારો કરી નવા મોબાઈલ કનેક્શન આપવા માટે આધાર આધારિત ઈ-કેવાયસી પ્રક્રિયા ફરી શરૂ કરી હતી.

હવે નવા નિયમ હેઠળ, ગ્રાહકો UIDAI આધારિત ચકાસણી દ્વારા તેમના ઘરે સિમ મેળવી શકે છે. DoT એ તેના આદેશમાં જણાવ્યું છે કે મોબાઇલ કનેક્શન ગ્રાહકોને એપ / પોર્ટલ આધારિત પ્રક્રિયા દ્વારા આપવામાં આવશે, જેમાં ગ્રાહકો ઘરે બેસીને મોબાઇલ કનેક્શન માટે અરજી કરી શકે છે.

હાલમાં, ગ્રાહકોને નવા મોબાઇલ કનેક્શન માટે કેવાયસી પ્રક્રિયામાંથી પસાર થવું પડે છે અથવા મોબાઇલ કનેક્શનને પ્રિપેઇડથી પોસ્ટપેડમાં રૂપાંતરિત કરવું પડે છે. આ માટે ગ્રાહકોએ તેમની ઓળખ અને સરનામાની ચકાસણીના દસ્તાવેજો સાથે દુકાનમાં જવું પડે છે.

ટેલિકોમ વિભાગે જણાવ્યું હતું કે કોરોના સમયગાળા દરમિયાન ગ્રાહકોની સુવિધા અને વેપારમાં સરળતા માટે કોન્ટક લેસ સેવાને પ્રોત્સાહન આપવાની જરૂર છે.